İLHAM ƏLİYEV RUSİYA “SİYASİ TƏLXƏYİNİ” QƏBUL ETDİ

jirinovski - aliyev

Hakimiyyət Putinin “Təlxək”ini gül-çiçəklə qarşıladı

Ziyafət Əsgərov: «Jirinovskiyə siyasi təlxək deyirlər, fikrimizcə, «tərif» doğrudursa da, natamamdır, çünki o, həm də xəstə siyasi təlxəkdir»
Azərbaycanda səfərdə olan Rusiya Liberal-Demokrat Partiyasının sədri Vladimir Jirinovski ölkə başçısı Ilham Əliyevlə görüşüb.

Rəsmi məlumata görə, görüşdə Azərbaycanla Rusiya arasında ikitərəfli münasibətlərin müxtəlif sahələrdə uğurla inkişaf etdiyi vurğulanıb, əlaqələrin möhkəmlənməsində parlamentlərarası əməkdaşlığın rolu qeyd edilib. Iki ölkənin ali qanunvericilik orqanları arasında əməkdaşlığın bundan sonra daha da genişləndirilməsi üçün yaxşı imkanların olduğu bildirilib.

Söhbət zamanı ikitərəfli münasibətlər, o cümlədən parlamentlərarası əlaqələrin hazırkı vəziyyəti və perspektivləri ətrafında fikir mübadiləsi aparılıb.

Vladimir Jirinovski Azərbaycanla bağlı qalmaqallı açıqlamaları ilə tanınır. Bu şəxs bir neçə dəfə Azərbaycan xalqının ünvanına təhqirlər səsləndirib, Dağlıq Qarabağın Rusiyaya birləşdirilməsini təklif edib və s. Ona görə də Jirinovskinin Azərbaycana səfəri cəmiyyət tərəfindən birmənalı qəbul edilmir. Hətta YAP-çı deputat Siyavuş Novruzov Jirinovskinin səfəri əfərəsində onun Azərbaycan xalqından üzr istəməli olduğunu bildirib.

Azərbaycan-Rusiya parlamentlərarası işçi qrupunun rəhbəri, deputat Arif Rəhimzadə isə onunla görüşməyəcəyini bildirməsi də maraqlıdır. Deputat modern.az-a bu barədə deyib: “Mən Bakıda səfərdə olan Rusiya Liberal Demokrat Partiyasının lideri, Dövlət Dumasının vitse-spikeri Vladimir Jirinovski ilə görüşməyəcəyəm. Azərbaycan-Rusiya parlamentlərarası komissiyası var. Uzaqbaşı o komissiyanın üzvləri Jirinovski ilə görüşə bilərlər. Bu dəqiqə başqa məsələlərlə məşğul olduğumdan, sizə əlavə nəsə deyə bilmirəm”. Bəlkə də Arif Rəhimzadə cəmiyyətin qınağından ehtiyat edərək Jirinovski ilə görüşməyəcəyini açıqlayıb.

Digər tərəfdən axı Jirinovski Azərbaycan xalqını təhqir edəndə hakimiyyət nümayəndələri onu “asıb-kəsərək” vətənpərvərlik nümayiş etdirirdilər. Məsələn, Milli Məclisin birinci vitse-spikeri Ziyafət Əsgərov onu psix və siyasi təlxək adlandırmışdı. Onun fikirlərini ixtisarla təqdim edirik: “Vladimir Jirinovskiyə siyasi təlxək deyirlər, fikrimizcə, ”tərif” doğrudursa da, natamamdır, çünki o, həm də xəstə siyasi təlxəkdir…
Bu sarsağın sayıqlamalarına əhəmiyyət verməmək də olardı, amma bu sözlərin Rusiya parlamentinin divarları arasında səslənməsi və orada heç olmasa kiçik bir etiraza səbəb olmaması təəssüf doğurur…

Artıq neçənci dəfədir ki, Jirinovski Azərbaycan xalqını, dövlətini təhqir edən bəyanatlar verir. Belə açıqlamalara münasibətdə Rusiyanın rəsmi dairələrində, elə bizdə də bəzən deyirlər ki, Jirinovskinin fikirləri “dəli sayıqlamalarıdır”.

Lakin bütün bunlara baxmayaraq indi hansısa səbəbdən Jirinovski Azərbaycan hakimiyyəti üçün əziz qonaq olub. O, hətta Ilham Əliyev səviyyəsində qəbul edilir.

Jirinovski özü də jurnalistlərə açıqlamasında Azərbaycanda çox yaxşı qarşılandığını, burada insanların rus dilində çox yaxşı danışdıqlarını bildirib. O, Azərbaycanda barəsində mənfi fikir formalaşmasına və hazırda Azərbaycan barədə müsbət fikirlər söyləməsinin səbəblərinə isə belə aydınlıq gətirib: “Bu, yanlış anlaşılmazlıqla bağlı idi. Müəyyən situasiya ilə bağlı söylənən fikir sonradan xalqa, ölkəyə aid edilir. Məsələn, hazırda Donbassa görə Kiyevdə mənə nifrət edirlər. Haradasa nə isə bir hadisə baş verəndə, biz onu qiymətləndiririk. Sonra da hər hansı situasiya ilə bağlı qiymətləndirməni o ölkə və xalqla bağlayırlar. Nəticədə yanlış anlaşılma olur”.

Bir məqamı da qeyd edək ki, Jirinovskini görüşlərdə deputat Səməd Seyidov müşayiət edib. Bu o Səməd Seyidovdur ki, Vaşinqtonda “Rusiya və Iran bizi sendviç kimi əzir” deyərək şimal qonşumuzun təzyiqlərinə görə Qərbdən yardım diləmişdi.

Jirinovski daim aşağıladığı Azərbaycana fəxri qonaq kimi gəldi 

jirinovskiRusiya Liberal Demokrat Partiyasının sədri Azərbaycana xüsusi nifrəti ilə tanınır. Hələ bir neçə il qabaq o, Heydər Əliyevi dünyanın ən varlı adamı adlandırmışdı: “Heydər Əliyev dünyanın ən varlı adamıdır, çünki, onun 8 milyon qoyunu var”. Aradan illər keçsə də, Azərbaycan hakimiyyətinin Rusiya ilə münasibətləri daim yüksək səviyyədə olsa da, Jirinovski mövqeyini dəyişmir. Ukrayna hadisələrinə münasibət bildirəndə də o, azərbaycanlı adında xalq olmadığını bildirmişdi. Daha sonra o, Dağlıq Qarabağın gah Ermənistana, gah da Rusiyaya birləşdirilməsini təklif etmişdi. Bütün bu təhqirlərə, aşağılamalara baxmayaraq o, Azərbaycana gəldi və yüksək səviyyədə qəbul olundu.
Onu gül-çiçəklə qarşılayan rəsmilərin müxtəlif vaxtlarda rusiyalı liberalla bağlı fikirlərinin sizin üçün də maraqlı olacağını düşündük. Bir sıra qəzetlərdən və saytlardan seçmələri yada salaq.

Jirinovski azərbaycanlıları təhqir etdi (17.03.2014)

Rusiyanın LDPR partiyasının lideri Vladimir Jirinovski yenə də qalmaqallı çıxışı ilə yadda qalıb.  AnsPress-in məlumatına görə, Dövlət Dumasında çıxışı zamanı o, azərbaycanlılar və ukraynalılardan danışıb. V.Jirinovski azərbaycanlı adında bir xalqın əslində mövcud olmadığını deyib.

“Azərbaycan rus dilinə tərcümədə nə deməkdir? Azər-Xəzər dənizi, baca-yəni yer deməkir. Yəni Xəzər dənizinin ətrafında yaşayanlar. Rusca xəzərlilər. Bu millət demək deyil axı. Bu həmin yerdə yaşayan insanlar deməkdir. Yəni necə ki, volqoqrodlular”,- deyə Jirinovski deyib.
Vladimir Jirinovski bir neçə gün əvvəl də qalmaqallı çıxışı ilə yadda qalmışdı. O, Dağlıq Qarabağın Rusiyaya verilməsini təklif etmişdi. Partiya liderinin sözlərinə görə, Dağlıq Qarabağ münaqişəsini yalnız bu yolla həll etmək mümkündür.

Ziyafət Əsgərov Jirinovskini “yırtıcı” adlandırdı (17.09.2012)

Milli Məclis (MM) sədrinin birinci müavini Ziyafət Əsgərov Rusiya Liberal Demokrat Partiyasının sədri Vladimir Jirinovskinin Ermənistan xüsusi xidmət orqanlarını Azərbaycan və azərbaycanlılara qarşı terrora çağırmasına münasibət açıqlayıb.

APA-nın MM-in saytına istinadən verdiyi məlumata görə, açıqlamada Azərbaycan Ordusunun zabiti Ramil Səfərovun ölkəyə ekstradisiyası və əfv olunması ilə bağlı bəzi məqamlar xatırladılıb: “Macarıstanda həbsdə olan Azərbaycan vətəndaşı Ramil Səfərovun məhkumların verilməsinə dair 1983-cü il beynəlxalq konvensiyasına müvafiq olaraq Azərbaycana verilməsi və Azərbaycan Konstitusiyası əsasında əfv edilməsindən sonra bəzi siyasətçilər, dövlətlər və beynəlxalq təşkilatlar Azərbaycanın suveren hüquqlarını nəzərə almadan ona qarşı haqsız, ədalətsiz bəyanatlar verməkdədirlər. Bu zaman siyasi əxlaq qaydaları diqqətə alınmır və ədalətsiz fikirlər səsləndirilir. Rusiya Dövlət Dumasının üzvü Vladimir Jirinovski dəfələrlə Azərbaycana və Türkiyəyə qarşı təhqiramiz ifadələr, bəyanatlar səsləndirib. Jirinovskinin siyasi siması hamıya məlumdur. Bu təlxəyin fikirləri artıq heç kimdə təəccüb doğurmur. Lakin özünü ”liberal demokrat” adlandıran bu maskalanmış hoqqabazın 14 sentyabrda Rusiyanın paytaxtı Moskva şəhərində “Rus-Erməni Birliyi”nin təşkilatçılığı ilə Ramil Səfərovun azad edilməsinə qarşı keçirilmiş aksiyada söylədiyi fikirlər onun əsl simasını üzə çıxarır və əndazəni aşdığını göstərir. Son hadisələr göstərir ki, Jirinovski artıq sadəcə hoqqabaz deyil, eyni zamanda insanların qanına susamış bir yırtıcıdır.

Vladimir Jirinovski Moskvada keçirilən aksiyada Azərbaycan-Rusiya dostluğunun ruhuna zidd olan, Azərbaycana qarşı siyasətçiyə, dövlət adamına yaraşmayan mənəviyyatsız, əxlaqsız və məsuliyyətsiz bəyanatlar səsləndirib.

Jirinovski kimdir? Rusiya siyasətinin əxlaqi dəyərlərə, insani münasibətlərə, Rusiyanın daxili qanunvericiliyinə, üzvü olduğu Rusiya Dövlət Dumasının şərəfinə, beynəlxalq hüquq norma və qaydalarına əməl etməyən, Rusiya siyasətinin ən məşhur hoqqabazı adını alanın biridir. Moskvada keçirilmiş aksiyada iştirak edən Jirinovski anadangəlmə məzhəkəçi istedadını bir daha nümayiş etdirərək təxminən 450 aksiya iştirakçısına yeni bir tragikomik tamaşa göstərib.

Aksiyada çıxışında Jirinovski sadəcə Ermənistanı dəstəkləməmiş, eyni zamanda bəşəri problem olan terrorizmin yeni dalğalarının yaranmasına çağırış edib. Rusiyanın öz daxilində terrorizm probleminin aktual olduğu, bütün dünyanın terrorizmə qarşı mübarizə apardığı bir vaxtda Rusiya Dövlət Dumasının vitse-spikeri olmuş bu şəxs Ermənistanı Azərbaycana qarşı terrora təşviq edib. Bu sərsəm siyasətçi nəinki terrora çağırır, hətta ermənilərə azərbaycanlıları necə öldürməyin “texnologiyasını” izah edir. Jirinovski regionun təhlükəsizliyini ciddi şəkildə təhdid edən Ermənistanı Rusiya dövlətinin silahlandırmalı, ona ən müasir silahlar olan S-300 və S-400 raketlərini verməli, Ermənistanı Cənubi Qafqazın ən böyük və güclü orduya malik dövləti etməli, Rusiyanın qondarma DQR-in müstəqilliyini tanımalı olduğunu bildirib.

Rusiyada yaşayan digər milli azlıqlara qarşı düşmən münasibəti ilə tanınan Jirinovski terrorizmə haqq qazandıran siyasətçi olduğunu bir daha təsdiqləyib.

Jirinovski aksiyadakı hoqqabazlığında “Mən erməni xalqına müraciət edirəm. Bu işi mitinqlərlə həll etmək olmaz. Erməni zabitini öldürəni sərbəst buraxan kimdirsə, ona gərəkli cavab vermək lazımdır. Ermənistan xüsusi xidmət orqanları azərbaycanlıların bir daha belə etməmələri üçün bu sualı cavabsız qoymamalıdırlar…” fikirlərini səsləndirib.

Dünyada elə bir parlament tapmaq olarmı ki, onun üzvü mitinqdə hansısa millətin nümayəndələrini qətl etməyə dair açıq-aşkar çağırışlar etsin?
Jirinovski Gürcüstanın da ərazi bütövlüyünü təhdid edən fikirlər səsləndirir, Cavaxetiyadakı erməniləri öz torpaqları uğrunda mübarizə aparmağa səsləyir.

Terrorçuluğu və separatizmi təşviq edən, müharibə çağırışları edən, dövlətlərin ərazi bütövlüyünə hörmət etməyən, humanistliyə zidd olan qorxunc fikirlər səsləndirən bu şəxsə Rusiya siyasi səhnəsində yer olmamalıdır. Bu insan nə etdiyini anlamır? Moskvanın ortasında Azərbaycana və azərbaycanlılara qarşı terrora çağırış etməklə nəyə nail olmaq istəyir?
Əlbəttə ki, Rusiya-Azərbaycan dostluğu bu cür insanın ağılsız fikirləri ilə zədələnəcək deyil, lakin bu təlxəyin demokratiyanın və söz azadlığının üstünlüklərindən faydalanaraq öz axmaq fikirlərini sərbəst şəkildə ifadə etməsinə imkan vermək olmaz. Rusiya dövlətçiliyi belə insanlardan qat-qat yüksəkdədir”.

Z.Əsgərov: “Jirinovski siyasi təlxək və psixi xəstədir” (18.03.2014)

Parlamentin vitse-spikeri Ziyafət Əsgərov Rusiya siyasətçisi V.Jirinovskinin Azərbaycan xalqının ünvanına söylədiyi fikirlərə münasibət bildirib.
Z.Əsgərov adi adamdan fərqli olaraq, siyasətlə məşğul olan şəxsin psixi xəstəliyə tutulması və ya anadangəlmə dəli olmasının təhlükəli fəsadları olduğunu söyləyib.

“V.Jirinovskiyə siyasi təlxək deyirlər, bu ”tərif” doğru olsa da natamamdır, çünki o, həm də xəstə siyasi təlxəkdir”, deyə Z.Əsgərov bildirib.
Dumanın iclasında “Azərbaycan” sözünün izahını yanlış verməsini Z.Əsgərov Azərbaycan xalqını təhqir kimi dəyərləndirib. Bu çıxış beynəlxalq hüquq normaları və siyasi etikanı ayaq altına almaq adlandırılıb.

“Bu sarsağın sayıqlamalarına əhəmiyyət verməmək də olardı, amma bu sözlərin Rusiya parlamentində səslənməsi və heç olmasa kiçik bir etiraza səbəb olmaması təəssüf doğurur”,- deyə vitse-spiker bəyan edib.

Z.Əsgərov V.Jirinovskinin Azərbaycan xalqı və dövlətinin ünvanına artıq neçənci dəfədir ki, təhqiramiz çıxış etdiyini xatırladıb. Bununla belə vitse-spiker “amma bu da reallıqdır ki, Jirinovskinin məsuliyyətsiz, ünvanına hədyanlar söylədiyi qonşu xalqlarda və dövlətlərdə hiddət doğuran, bir sıra hallarda diplomatik qalmaqallara səbəb olan ”ritorikası”nın qarşısı alınmır”.

Z.Əsgərov Jirinovski kimi təlxəyin söz azadlığı imkanlarından axmaq və təhlükəli fikirlərini davam etməsinə “dur” deməyin vaxtının çoxdan çatdığını nəzər çatdırır.

Oqtay Əsədov: “Jirinovski ilə bağlı harasa müraciət etməyə ehtiyac yoxdur” (04.04.2014)

Rusiya Federasiya Dövlət Dumasının vite-spikeri Vlaidimir Jirinovskinin növbəti sərsəm fikirləri Azərbaycan xalqının ciddi narahatlığına səbəb olub, eyni zamanda, Azərbaycan-Rusiya ikitərəfli əməkdaşlıq münasibətlərinə öz mənfi təsirini göstərir.

Gün.Az xəbər verir ki, bunu parlamentin aprelin 4-də keçirilən plenar iclasında millət vəkili Fəzail Ağamalı dilə gətirib.

Millət vəkili təklif edib ki, V.Jirinovskinin hərəkətləri ilə bağlı Rusiya Federasiyası Dövlət Dumasının rəhbərliyinə Azərbaycan parlamenti adından müraciət edilsin və bu müraciətdə həmin şəxsin hərəkətlərinin bu cür yanlış hərəkətlərinin, davranışlarının dayandırılması, qarşısının alınması tələb olunsun.

Buna cavabında spiker Oqtay Əsədov bildirib ki, V.Jirinovski ilə bağlı hər hansı bir müzakirəyə və müraciətə ehtiyac yoxdur.
“Jirinovskiyə Milli Məclis sədrinin I müavini Ziyafət Əsgərov tərəfindən çox tutarlı cavab verildi. Özünüz də görürsünüz ki, həmin gündən bu yana o heç nə danışmır. Birdə ki, bir adam öz milliyətini dana, ondan nə gözləyəsən?!” – deyə, spiker vurğulayıb.

“Jirinovski yenə sarsaqlasa, onu qoyun kimi mələdəcəm” (16.09.2014)

“O vaxt o, azərbaycanlıları ”qoyun” adlandıranda, onu oturdub başa saldıq. Sözümüzü də dedik. Əgər Jirinovski yenə sarsaqlasa, bu dəfə onun özünü qoyun kimi “mələdəcəyəm”.

Bu sözləri Hafta.az-a açıqlamasında Müasir Müsavat Partiyasının sədri Hafiz Hacıyev deyib. Partiya sədrinin sözlərinə görə, RLDP sədrinin Bakıya gəlişini casusluq fəaliyyəti kimi qiymətləndirmək olmaz: “O, bizim ölkədəki inkişafı görməyə gəlir. Gəlir ki, baxıb valeh olsun. Heydər Əliyevin qurduğu Azərbaycan onda hər zaman xoş ovqat yaradıb”.
Köhnə qəzetçilər bu yerdə “əlavə şərhə ehtiyac yoxdur” yazardı…

~ tərəfindən Patriot 27/09/2014.

Rica olunur şərh yazarkən təhqirə yol verməyin

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

 
%d bloqqer bunu bəyənir: