ƏLİ KƏRİMLİ OĞLUNUN HƏBSİNDƏN DANIŞDI

eli - turkel kerimli

«Hökumətin mənə və ailəmə qarşı siyasəti cəngəllik qanunları ilə müəyyənləşir»

AXCP sədri Əli Kərimli “Amerikanın Səsi”nə müsahibəsində oğlu Türkel Kərimlinin həbsindən danışıb. Müsahibəni təqdim edirik:

– Sizin oğlunuza məhkəmə inzibati qaydada 25 sutka həbs kəsib. Necə qiymətləndirirsiniz? Buna səbəb vardı?

– Heç bir səbəb yox idi. Oğlum heç bir qanunazidd əməl törətməyib. Yoldaşları ilə şəhərdə gəzən zaman, tamamilə onlar üçün gözlənilməz şəkildə polislər onları saxlayıb, polis bölməsinə aparıb.
Iki gün baş sındırblar ki, onlara hansı ittihamı irəli sürsünlər. Bir neçə dəfə ittihamı dəyişdiriblər. Əvvəl ittiham belə idi ki, guya hansısa plakat cırıblar, amma nə cırılan plakat üzə çıxdı, nə onu göstərə bildilər, baxmayaraq ki, o plakatların yanında kameralar var idi. Sonra polisə müqaviməti ortalığa atdılar. Yenə də orada kameralar var idi.
Kameralara müraciət edə bilərdilər ki, polisə müqavimət necə olub, onu da etmədilər. Tamamilə qurama bir ittihamdır. Məndən qisas almaq məqsədi ilə quraşdırılmış ittihamdır. Fikir veribsinizsə, sanksiyanın ən yuxarı həddində inzibati cəza kəsiblər, 25 sutka.
Bu həm də Türkelin təhsilinə mane olmaq cəhdidir. Çünki sabah Türkelin dərsi başlayır, 3-cü kurs tələbəsidir, əla oxuyur. Belə bir vaxtda demək olar ki, onun bir ayadək dərs buraxması təhsilinə çox ciddi zərbədir. Görünür dolayı məqsədlərdən biri də bundan ibarətdir.
Ümumiyyətlə hökumətin mənə və ailəmə qarşı siyasəti cəngəllik qanunları ilə müəyyənləşir. Bilirsiniz ki, əvvəllər əmim oğlu siyasi məhbus həyatı yaşadı, hazırda qaynım iki ilə yaxındır heç bir əsassız və məhkəməsiz Milli Təhlükəsizlik Nazirliyinin təcridxanasında girov saxlanılır. Özümə qarşı hələ də bağlanmamış cinayət işləri var, pasport verilmir.
Yeri gəlmişkən sabah Avropa Birliyinin parlamentində Azərbaycanda insan haqlarının vəziyyəti ilə bağlı dəyirmi masaya dəvət olunmuşdum, amma təbii ki, pasportum olmadığı üçün bu tədbirə də qatıla bilməyəcəm. Cəbhəçilərə də münasibət çox sərtdir. Bu günlərdə Pərviz Həşimliyə mənə qarşı bəyanat vermədiyinə, partiyaya qarşı hazırlanmış bəyanatı imzalamadığına görə qurama ittihamlarla cinayət işi qaldırılıb. Partiyamızın Qəbələ rayon fəallarından biri Tehran bəy qurama işlə 25 sutka həbsə məruz qalıb.
Daha bir neçə partiya funksionerinə ciddi təzyiqlər edilir. Hətta ciddi təzyiqlər edilir ki, onlar partiyadan imtina etməlidirlər, yoxsa onlara qarşı qurama cinayət işləri olacaq.
Yəni, bu rəqabətdən qorxan, azad, ədalətli seçkilərdə məğlub olacağını dəqiq bilən Ilham Əliyevin öz rəqiblərindən qisas almasının növbəti raundudur. Bu qisas əməliyyatıdır. Əli Kərimliyə qarşı qisas əməliyyatıdır. Mən dönə-dönə ona müraciət edirəm ki, öz əməllərimə görə özüm məsuliyyət daşımaq istəyirəm. Nə mənim günahsız qaynım, nə mənim siyasətdən uzaq olan günahsız oğlum, nə başqa qohumlarım mənə görə məsuliyyət daşımamalıdır. Dünyanın heç bir yerində belə, siyasət, belə əxlaq, belə mənəviyyat yoxdur. Azərbaycanı bu qədər geriyə çəkmək, bu qədər cəhalətə  qaytarmaq olmaz. Azərbaycan hökuməti bu siyasəti ilə bütövlükdə ölkəni rüsvay edir. Mən çox təəssüflənirəm. Onu da bildirmək istəyirəm ki, cəbhəyə, ailəmə, özümə qarşı təzyiqlər çox olsa da, bu təzyiqlər məni yolumdan döndərə bilməz. Mən öz ideyalarımda ardıcılam və ideyalarımın gerçəkləşməsi üçün bütün mümkün olanları edəcəm.

– Bir çox eksperltər deyir ki, seçki dövründə sizi təsir altında saxlamaq üçün belə hərəkət edilib. Siz necə qiymətləndirirsiniz, vəziyyətdən çıxışı nədə görürsünüz?

– Əgər bunu düşünürlərsə çox səhv edirlər. Məni hansı təsir altında saxlaya bilirlər ki? Mən onsuz da nə qaynımın, nə oğlumun, nə də başqa olacaq qohumlarımın həbsinə görə mübarizəmi səngitmirəm. Milli Şurada birliyin saxlanması üçün, Milli Şurada vahid namizədimiz Cəmil Həsənlinin uğur qazanması üçün bütün mükün olanları edirəm.
Bilməlidirlər ki, hər hansı addımlar atmalarından asılı olmayaraq gücüm çatan qədər bu mübarizədə olacam. Burada geri çəkilməkdən söhbət gedə bilməz. Ona görə də hesab edirəm ki, əgər o ümidlə edirlərsə, çox səhv edirlər.
Bu prosesin nəticəsində onlar nəyə nail olurlar? Mənə, ailəmə, xüsusilə siyasi təcrübəsi az olan ailə üzvlərimə bir sıxıntı yaşadırlar. Eyni zamanda, özləri bütün dünyada rüsvay olurlar. Azərbaycan xalqının mütərəqqi hissəsinin gözündən tamamailə düşürlər. Amma onsuz da mənim siyasi fəaliyyətimə hər hansı formada təsir göstərə bilmirlər. Nəinki qohumlarımın, mənim özümün də həbs olunmağım siyasi fəaliyyətimdə hər hansı korrektə yarada bilməz.

– Vəziyyətdən çıxışı nədə görüsünüz? Məhkəmələrə müraciət edəcəksinizmi, apelyasiya şikayəti verəcəksinizmi?

– Əlbəttə apelyasiya şikayəti olacaq. Vəkil var. Biz tələb edəcəyik ki, həmin ərazilərdəki kameraların video lentləri təqdim olunsun. Oğlumun tam günahsız olduğuna yüzdə-yüz əminəm. Müstəqil məhkəmə olmadığına da əminəm. Ona görə də bütün hüquqi prosedurlara baş vuracağıq. Amma, eyni  zamanda onu da biləcəyik ki, biz hüquqsuz bir ölkədə yaşayırıq.

– Ittihamları necə qiymətləndirərdiniz? Oğlunuz içkili vəziyyətdə, belə bir ittiham var…

– Tamamilə boş söhbətdir. Ümumiyyətlə oğlumu qaralamq istəyirlər. Siz fikir vermirsiniz? Bu debatlarda mən namizəd olmaya-olmaya hökumətin sözçüləri tərəfindən ən çox vaxt mənə sərf olunur. Məndən sonra isə ən çox vaxt oğluma həsr olunur. Bəri başdan artıq mənim oğlumu qaralamq üstündə kampaniyaya başlayırlar. Görünür onun yüksək təhsil alması, təhsildəki nailiyyətləri bir çoxlarını qıcıqlandırır, narahaat edir. Çox təəssüf ki, belə adamlar da var. Çox  təəssüf ki, belə adamlar da var ki, bir azəbaycanlı gəncin yüksək təhsil nailiyyətindən qıcıqlanırlar, ondan narahat olurlar. Çox təəssüf edirəm ki, belə adamlar da var. Belə adamlar daha çox hakmiyyətdə təmsil olunurlar. Bunların hamısı məhz o məqsədlərlə quraşdırılmış ittihamlardır. Oğlumu yoldaşları ilə şəhərdə gəzən zaman yaxalayıblar, polis idarəsinə aparıblar. Oğlum yaxşı bilir ki, atası və ailəmiz hansı təhlükədədir. O heç bir halda qeyri-qanuni addımlar atan adam deyil. Onun nə plakat cırması, nə içkili vəziyyətdə olub hansısa başqa hərəkətlər eləməsi qətiyyən inadırıcı deyil, mümkün də deyil. Məhkəmədə də bunların heç biri ortaya çıxmadı. Bir dənə  fakt ortaya qoya bilmədilər. Iki polis işçisi gətirib saxta şahid etmişdilər, onlar da bir-birinin dediklərini təkzib etdilər. Ona görə bu tamamilə absurd ittihamdır. Bizim gözümüzün qarşısında olduqca günahsız adamlara indiyədək dəfələrlə mənasız və cəfəng ittihamlar irəli sürülüb. Bu da onun tərkib hissəsidir. Bu siyasi qisasçılıq əməliyyatıdır.

~ tərəfindən Patriot 24/09/2013.

Rica olunur şərh yazarkən təhqirə yol verməyin

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma